ကရင်မျိုးချစ်လူငယ်အမြောက်အများကိုလည်း မွေးထုတ်ပေးနိုင်ခဲ့သည်။ကရင်စကားပြောရေး၊ ကရင်ဝတ်စုံဝတ်ရေး၊ ကရင်လူမျိုးများအမည်ရှေ့တွင် နော်၊ နမ့်၊ စော၊ စ၊ မန်း စသည်တို့ ထည့်သွင်းပြောဆိုရေး၊ ကရင်စာပေသင်ကြားရေးမှသည် အမျိုးသားကိုယ်စားပြု ကရင်အမျိုးသားအလံ၊ ကရင်အမျိုးသားသီချင်း၊ ကရင်အမျိုးသားနေ့ (National Day) ရရှိရေးအတွက် တိုင်းတစ်ပါးအုပ်ချုပ်သူ အင်္ဂလိပ်အစိုးရထံ တင်ပြတောင်းဆိုခဲ့သည်။(ကရင်အမျိုးသားနေ့အစား ၁၉၃၈-ခုနှစ်တွင် ကရင်နှစ်သစ်ကူးနေ့ကိုသာ ရရှိခဲ့သည်။ထိုအချိန်သည် နယ်ချဲ့ဆန့်ကျင်ရေး၊ လွတ်လပ်ရေးတိုက်ပွဲပြင်းထန်စဉ်ကာလဖြစ်၍ ကရင်လူမျိုးတို့အား အမျိုးသားရေး၊ နိုင်ငံရေးလမ်းကြောင်း လွှဲပြောင်းပေးခဲ့ခြင်းသာဖြစ်သည်။စာရေးသူ)
ပဒေသရာဇ်ခေတ်တစ်လျှောက်လုံး ဖြတ်သန်းလာခဲ့ကြသည့်ကာလတွင်သာမက ထို့ထက်ဆိုးဝါးသည့် တိုင်းတစ်ပါးနယ်ချဲ့စနစ် စတင်ဝင်ရောက်လာချိန်၊ မြန်မာနိုင်ငံတစ်ခုလုံး သူ့ကျွန်ဘ၀မရောက်ရှိခင်ကတည်းက ဒေါကလူအသင်း၏အမျိုးသားကြိုးပမ်းမှုသည် ဘိုးဘေးတို့၏ အမျိုးသားရေးတာဝန်ကို လွှဲပြောင်းပေးနိုင်ခဲ့သလို နောက်မျိုးဆက်သစ်တို့အား အမြော်အမြင်ကြီးစွာ လက်ဆင့်ကမ်းပေးနိုင်ခဲ့သည်။ဒေါကလူအသင်းကို ပထမဆုံးတည်ထောင်ခဲ့သူမှာ ဒေါက်တာတီသံဗြာ (M.A,D.D) ဖြစ်သည်။ဒေါကလူအသင်းနှင့်ဒေါက်တာတီသံဗြာသည် ဒင်္ဂါးပြားတစ်ခု၏ ခေါင်းနှင့်ပန်းကို ခွဲမရသကဲ့သို့ ဒေါကလူအသင်းသည်လည်း ကရင်လူမျိုးတို့၏နှလုံးအိမ်တွင် ဖျက်မရသည့် အမျိုးသားရေးမှတ်တိုင်တစ်ခုဟု ဆိုချင်ပါသည်။
ဒေါက်တာတီသံဗြာ၏ အမည်ရင်းမှာ သံဗြာဖြစ်သည်။ ၁၈၄၂-ခုနှစ်၊ ပုသိမ်မြို့ ကျုံလားရွာတွင် မွေးဖွါးခဲ့ပြီး မိဘနှစ်ပါးစလုံးမှာ စကောကရင်လူမျိုးများဖြစ်ကြသည်။(၆)နှစ်သားအရွယ်တွင် ဖခင်ဆုံးပါး၍ မိခင် မုဆိုးမကြီးနှင့် နေထိုင်ကြီးပြင်းလာခဲ့ရပြီး စားဝတ်နေရေးအတွက် ကျွဲကျောင်းသည့်အလုပ်ကိုပင် လုပ်ကိုင်ခဲ့ရသည်။ သံဗြာ(၁၀)နှစ်သားအရွယ် ၁၈၅၂-ခုနှစ်တွင် အင်္ဂလိပ်-မြန်မာ ဒုတိယစစ်ပွဲဖြစ်ပွါးလာသဖြင့် တောပုန်းဓားပြရန်မှ လွတ်ကင်းရန်အတွက် ပုသိမ်မြို့ပေါ်သို့ ပြောင်းရွှေ့ခဲ့ရသည်။ ထိုအချိန်မှစ၍ ကျွဲကျောင်းသား သံဗြာသည် အမေရိကန်နှစ်ခြင်းသာသနာမှ ဖွင့်လှစ်သည့် ကိုးဆူအကယ်ဒမီကျောင်းတွင် ပညာသင်ခွင့်ရခဲ့သည်။ ကိုးဆူအကယ်ဒမီကျောင်းသည် နွေရာသီတွင်သာဖွင့်လှစ်သည့်ကျောင်းဖြစ်သည်။
ဓနုဖြူမြို့တွင် အလှည့်ကျ နှစ်ခြင်းခရစ်ယာန်အစည်းအဝေးကျရောက်သည့် နှစ်တစ်နှစ်တွင် ရန်ကုန်၊ ပုသိမ်၊ ဓနုဖြူ ဒေသအသီးသီးမှ နှစ်ခြင်းခရစ်ယာန်ခေါင်းဆောင်များနှင့် ဘာသာဝင်အများအပြားလာရောက်ကြရာ သံဗြာတို့ သားအမိသည်လည်း အပါအ၀င်ဖြစ်သည်။ ထိုအစည်းအဝေးတွင် သူတို့သားအမိသည် သာသနာပြုဆရာ မစ္စတာဗင်တန်တို့ဇနီးမောင်နှံနှင့်ဆုံတွေ့ခဲ့သည်။ ဤသည်ပင် သံဗြာအဖို့ ဘ၀အလှည့်အပြောင်းဖြစ်စေခဲ့သည်။ (မစ္စတာဗင်တန်သည် အင်္ဂလိပ်-မြန်မာ ဒုတိယစစ်ပွဲတွင် ပဲခူးရိုးမှဒေသမှ ကရင်စစ်ပြေးဒုက္ခသည်များအား ရန်ကုန် အလုံရွာ(ယခု ကရင်ခြံ)ကို ဂရန်ခံဝယ်ယူ၍ ရွာတည်ထောင်ပေးခဲ့သူဖြစ်သည်။)
သံဗြာ၏ရိုးသားမှု၊ ဥာဏ်ရည်ထက်မြက်မှုကို သာသနာပြုဆရာများက သဘောကျကြသည်။ မစ္စတာဗင်တန်၏ ရည်ရွယ်ချက်မှာ ခရစ်ယာန်သာသနာပြုလုပ်ငန်းကို နောင်တစ်ချိန်တွင် ဒေသခံတိုင်းရင်းသားများသို့ လွှဲပြောင်းပေးနိုင်ရေးအတွက် ကယ်ဆယ်ရေးလုပ်ငန်းနှင့်အတူ ကျန်းမာရေး၊ ပညာရေးလုပ်ငန်းများကိုပါ ဘက်စုံဆောင်ရွက်ခဲ့သည်။ဤအထဲတွင် သံဗြာအား အမေရိကန်ပြည်သို့ပို့၍ ပညာသင်ကြားစေရေးလည်းပါဝင်သည်။ သံဗြာကိုယ်တိုင် ပညာသင်ကြားလိုစိတ်၊ စွန့်စားလိုစိတ်ရှိသူဖြစ်၍ သံဗြာ၏မိခင်သည်လည်း သား၏နောင်ရေးအတွက် သံဗြာအား မစ္စတာဗင်တန်ဇနီးမောင်နှံထံသို့ အပ်နှံလိုက်သည်။ သံဗြာကို ပညာသင်စေလွတ်ရန် ရည်ရွယ်၍ ရန်ကုန်သို့ခေါ်ဆောင်လာခဲ့သည်။၁၈၅၈-ခုနှစ်တွင် မစ္စတာဗင်တန်ကွယ်လွန်၍ သံဗြာအဖို့ ပညာသင်ကြားရေးသည်လည်း ကံမကောင်းအကြောင်းမလှ၍ ရပ်ဆိုင်းသွားခဲ့ရသည်။
၁၈၆၅-ခုနှစ်သို့ ရောက်သောအခါ အမေရိကန်ပြည်သို့ပြန်၍ အနားယူမည့် သာသနာပြုဆရာမ မစ္စစ်အင်ဂေါအား သာသနာပြုအားလုံးက သံဗြာကို ခေါ်ဆောင်သွားရန်အဆိုပြုကြရာ သံဗြာအဖို့ အမေရိကန်ပြည်သို့ ပညာသင်ကြားရေးအတွက် အခွင့်အလမ်းတစ်ခု ထပ်မံပေါ်ပေါက်ခဲ့ပြန်သည်။သံဗြာသည် အလားအလာကောင်းသည့် လူငယ်တစ်ဦးဟု အများကယူဆထားကြရာ မစ္စစ်အင်ဂေါနှင့်အတူ အမေရိကန်နိုင်ငံသို့ ပညာသင်ကြားရန် လိုက်ပါခွင့်ရခဲ့သည်။သံဗြာ၏အကြောင်းကြားမှုကြောင့် ပုသိမ်တွင် ရှိနေသည့်မိခင်ကြီးသည်လည်း မိမိသားအား ၀မ်းသာအားရဖြင့် ရန်ကုန်သို့လာ၍ နှုတ်ဆက်ခဲ့သည်။သို့သော်လည်း သံဗြာ၏မိခင်သည် အဖမဲ့သားအား မိစုံဖစုံမဟုတ်ဘဲ လူလားမြောက်အောင် ကျွေးမွေးစောင့်ရှောက်ခဲ့ရပြီး မပြည့်မစုံဘ၀ဖြစ်၍ နိုင်ငံခြားပညာသင်သွားမည့် သားဖြစ်သူအား ငွေသားတစ်မတ်နှင့် ကရမက်တုံးလေး တစ်တုံးသာ ရေခြားမြေခြားသွားမည့် သားဖြစ်သူအား အမှတ်တရ အလွမ်းပြေလက်ဆောင်ပေးလိုက်နိုင်ရှာသည်။ သို့သော်လည်း သံဗြာ၏ မုဆိုးမမိခင်စိတ်ထဲတွင် မိခင်မေတ္တာသည်လည်းကောင်း၊ အနာဂတ်ကရင်အမျိုးသားများအတွက် သားကောင်းတစ်ယောက် မွေးဖွားကျွေးမွေးခွင့်ရခဲ့သည့် ရည်မှန်းချက်နှင့်ဂုဏ်ယူမှုသည်လည်းကောင်း ငွေသားတစ်မတ်နှင့် ကရမက်တုံးလေးတစ်တုံးဖြင့် နှိုင်းယှဉ်တန်ဖိုးဖြတ်၍ ရနိုင်မည်မထင်ပါ။
အမေရိကန်နိုင်ငံသို့အသွား စီးလာသည့် ပင်လယ်ကူးသင်္ဘောသည် ထိုစဉ်က အာဖရိကတိုက်ဂွတ်ဟုပ်အငူကို လှည့်ပတ်မောင်းရသဖြင့် အမေရိကန်ပြည်သို့ရောက်ရန် (၆)လကြာမောင်နှင်ခဲ့ရသည်။ သံဗြာ၏အသက်သည် (၂၃)နှစ်အရွယ်ဖြစ်သည်။ အမေရိကန်ပြည်သို့ရောက်ပြီး နယူးယောက်မြို့မှတဆင့် ဘော်စတွန်မြို့သို့ရောက်ခဲ့သည်။ ထိုနိုင်ငံတွင် သံဗြာသည် စားဝတ်နေရေးအတွက် သတင်းစာ၊ ဂျာနယ်၊မဂ္ဂဇင်းများကို လမ်းတောက်လျှောက်ရောင်းချပြီး ပညာသင်ကြားရေးအတွက် ငွေစုခဲ့ရသည်။သံဗြာသည် မြန်မာနိုင်ငံတွင် နေထိုင်စဉ်ကတည်းက မစ္စတာဗင်တန်တို့ဇနီးမောင်နှံကျေးဇူးကြောင့် မြေတိုင်းပညာကို တတ်မြောက်ခဲ့ရာ အမေရိကန်ပြည်၏ မီးရထားဌာနတွင် မြေတိုင်းအလုပ်ကို ဆက်လုပ်ရင်း ငွေစုပြန်သည်။ထိုစဉ်က အမေရိကတိုက် တောတောင်များတွင် ကျွဲရိုင်းများပေါလှ၍ မီးရထားဖေါက်လုပ်ရာတွင် ကျွဲရိုင်းအန္တရာယ်ကို နှိမ်နင်းရေးအတွက် မီးရထားကုမ္မဏီများက သေနတ်ပစ်ခတ်နှိမ်နင်းရန် လူငှားခဲ့သည်။ ငယ်စဉ်က လောက်လေးခွဖြင့် ကျွဲကျောင်းခဲ့ဖူးသည့် သံဗြာအတွက် ကျွဲရိုင်းများနှိမ်နင်းရေးအလုပ်ရခဲ့ပြန်သည်။
သံဗြာသည် စာနယ်ဇင်းရောင်းချသည့်အလုပ်၊ မြေတိုင်းအလုပ်၊ ကျွဲရိုင်းနှိမ်နင်းရေးအလုပ်တို့မှ စုဆောင်းရရှိသည့်ငွေဖြင့် ဂိုချက်စတာတက္ကသိုလ်၌ တက်ရောက်ပညာသင်ကြားခဲ့သည်။ အမေရိကန်ပြည်ထောင်စုသို့ရောက်ပြီး (၆)နှစ်အကြာ ၁၈၇၁-ခုနှစ်တွင် ၀ိဇ္ဇာဘွဲ့(B.A)ကို ရရှိခဲ့သည်။ နောက်(၂)ကြာသောအခါ (M.A)ဘွဲ့ကို ရရှိခဲ့ပြန်သည်။ မိမိစရိတ်ဖြင့် အမေရိကန်နိုင်ငံတွင် မဟာဝိဇ္ဇာဘွဲ့ကို ရရှိခဲ့သည့် မြန်မာနိုင်ငံသားများအနက် ဒေါက်တာတီသံဗြာသည် ပထမဆုံးဖြစ်သည်။ ဒေါက်တာတီသံဗြာသည် ပညာရေးရည်မှန်းချက်ပြည့်စုံသည်နှင့် အမိနိုင်ငံသို့ ပြန်လာခဲ့သည်။ ကမ္ဘာအရပ်ရပ်သို့ရောက်ဖူးခဲ့ပြီး အမေရိကန်ပြည်ထောင်စုတွင် မဟာဝိဇ္ဇာဘွဲ့ကို ရရှိခဲ့သည့် ဒေါက်တာတီသံဗြာသည် အမိနိုင်ငံသို့ပြန်ရောက်သောအခါ ဗြိတိသျှအုပ်ချုပ်ရေးယန္တရားတွင် ရာထူးပေးဆွဲဆောင်သော်လည်း ငြင်းပယ်ခဲ့သည်။အလုံ-ပဲခူး ကရင်အထက်တန်းကျောင်း(ယခု အ.ထ.က (၁၀)အလုံ)တွင် ကျောင်းဆရာအဖြစ် ၀င်ရောက်အမှုထမ်းခဲ့သည်။စကောကရင်ဘာသာဖြင့် စာအုပ်ပေါင်း(၂၅)အုပ်အထိ ပြုစုခဲ့ရာ စကောကရင်-အင်္ဂလိပ် အဘိဓာန်သည်လည်း အပါအ၀င်ဖြစ်သည်။ခရစ်ယာန်ဘာသာတရားဆိုင်ရာ စာပေပြုစုမှုအတွက် (D.D)ဘွဲ့ကိုလည်း ရရှိပြန်သည်။
နှစ်ရှည်လများ ကမ္ဘာအရပ်ရပ်တွင် ရောက်ရှိနေထိုင်ခဲ့ဖူးသော်လည်း ဒေါက်တာတီသံဗြာသည် အမိမြေနှင့် မိမိလူမျိုးကို ချစ်မြတ်နိုးသူဖြစ်ကြောင်း ၄င်း၏ ရင်ဖွင့်ရေးသားချက်တစ်ခုတွင် ကမ္ဘာပေါ်မှာ အလှပဆုံးဖြစ်သည့် မိမိမွေးရပ်ဇာတိမြေသို့ ပြန်လာသော ကျွန်ုပ်အား ရန်ကုန်မြစ်ဝဲယာနှစ်ဘက်ရှိ ရေစပ်ဆီမှ လေအဟုန်ကြောင့် ယိမ်းညွတ်နေသော လမုပင်ကလေးများသည်ပင် ၀မ်းပန်းတသာ ကြိုဆိုနေကြရော့လေသလားဟု ကျွန်ုပ်မှတ်ထင်မိတော့သည် ဟူ၍ပါရှိသည်။အမိမြေနှင့် အမျိုးကိုချစ်တတ်သူ၊ ကရင်လူမျိုးတို့၏အမျိုးသားရေးကို အတိုင်းအဆ ဖေါ်မပြနိုင်သောရည်မှန်းချက်ဖြင့် အမျိုးသားရေး မီးရှူးတိုင်အဖြစ် ၁၈၈၁-ခုနှစ် ဒေါကလူခေါ် ကရင်အမျိုးသားအသင်း (Karen National Association)ကို တည်ထောင်ခဲ့သူ ဒေါက်တာတီသံဗြာသည် ကရင့်နှလုံးအိမ်ထဲတွင် ထင်ကျန်ရစ်နေဆဲ အမျိုးသားရေးမှတ်တိုင်တစ်ခု ဖြစ်ပေသည်။
ဘိုးပိုက်ဆံ
၁၈၆၆-ခုနှစ်တွင် ဘိုးပိုက်ဆံဆိုသူ ကရင်အမျိုးသားတစ်ဦးသည် ဗုဒ္ဓ၀ါဒနှင့် ခရစ်ယာန်တို့ ကရင်တို့ရိုးရာ ကိုးကွယ်ယုံကြည်မှုတို့မှ ကောင်းနိုးရာရာကို စုပေါင်း၍ ဘာသာသစ်တစ်ခုကို တည်ထွင်ခဲ့သည်။ကိုစံရီနှင့် တောင်ငူမှ ခလီဘိုးပါ ဆိုသူတို့သည်လည်း အလားတူ ယုံကြည်မှုအသစ်ကို တည်ထွင်ခဲ့ကြသည်။ခရီဘိုးပါ၏ ယုံကြည်မှု အသစ်အဆန်းကို စောဂွန်ဆင်ဒီဘိုးမင်းက ဆက်ခံ၍ တိုးတက်ပျံ့ပွါးအောင် ဆောင်ရွက်ခဲ့သည်။(မြန်မာ့စွယ်စုံကျမ်း) ဘိုးပိုက်ဆံအမည်သည် အများတင်စားခေါ်ဝေါ်သောအမည်ဖြစ်ပါသည်။ အမည်ရင်းမှာ စောဆာဖိုးဝါး ဖြစ်သည်။
စောဆာဖိုးဝါးထက် ဘိုးပိုက်ဆံအမည်ကိုသာ လူသိများကြသည်။သူသည် သာမန်တောသူတောင်သားတစ်ဦးအနေဖြင့် မစွမ်းဆောင်နိုင်သော ဗုဒ္ဓဘာသာနှင့် ခရစ်ယာန်ဘာသာကို ပေါင်းစည်း၍ ဘာသာသစ်တစ်ရပ်ကို ပြုစုပျိုးထောင်နိုင်ခဲ့သူပင်ဖြစ်သည်။ သို့ဖြစ်၍ သူ့အမည်ကို မြန်မာ့စွယ်စုံကျမ်းတွင် ဖေါ်ပြခြင်းခံခဲ့ရသည်။စောဆာဖိုးဝါး(ခေါ်) ဘိုးပိုက်ဆံသည် ၁၈၆၆-ခုနှစ်၊ဗြိတိသျှတို့အောက်ပြည်အောက်ရွာကို သိမ်းပြီးခါစ အုပ်ချုပ်ရေး မတည်ငြိမ်သေးသော ကာလ၌ ပေါ်ထွန်းလာသော အမည်ဖြစ်သည်။ထိုစဉ်က အများပြည်သူတို့သည် တစ်ဘက်တွင် ကြောက်ရွှံ့ခြင်းဘေးကို ရင်ဆိုင်ရသောကြောင့် ကိုးကွယ်အားထားမှုကို ရှာဖွေကြသည်။ထို့ကြောင့် ဘိုးပိုက်ဆံကို သိဒ္ဓိပေါက်နေသော ပုဂ္ဂိုလ်ထူးအဖြစ်မှတ်ယူကာ မူလနာမည်ပျောက်ပြီး တစ်ယောက်ကစ တစ်ရာ ဆိုသလို ဘိုးပိုက်ဆံဟု ခေါ်တွင်သွားတော့သည်။ ဘိုးပိုက်ဆံ၏ မူလအကြောင်းရင်းခံသော ဘာသာမှာ ဗုဒ္ဓဘာသာဖြစ်သည်။နောက်ပိုင်းတွင် ဘိုးပိုက်ဆံသည် လိမ္မာပါးနပ်စွာဖြင့် ဗြိတိသျှတို့ ကျေနပ်အောင် ဗုဒ္ဒဘာသာနှင့် ခရစ်ယာန်ဘာသာကို ပေါင်းစည်း၍ ဘုရားတည်ခြင်း၊ ကျောင်းဆောက်ခြင်း ဒါနအခန်းကို ဆောင်ရွက်ခဲ့ခြင်းဖြစ်ပါသည်။
စောဆာဖိုးဝါး(ခေါ်) ဘိုးပိုက်ဆံကို မြန်မာသက္ကရာဇ် ၁၂၁၅-ခုနှစ်တွင် မွေးဖွါးသည်။ မိဘနှစ်ပါးမှာ စောရွှေရင်အေးနှင့် နော်နယိးစေးတို့ဖြစ်ကြသည်။ မွေးချင်း ၅ ယောက်ရှိသည့်အနက် စောဆာဖိုးဝါးသည် တတိယမြောက် သားရတနာဖြစ်သည်။ မွေးဇာတိမှာ ဖာပွန်တောင်တန်းပေါ်ရှိ နာခိုခီးရွာဖြစ်သည်။ ဘိုးပိုက်ဆံသည် တောင်ပေါ်နေ ကရင်လူမျိုးများကဲ့သို့ သန်စွမ်းခြင်းမရှိဘဲ သေးသေးသွယ်သွယ်နှင့် နွဲ့နွဲ့နှောင်းနှောင်းပင်ဖြစ်သည်။ သို့ဖြစ်၍ အရွယ်ရောက်သောအခါ အခြားလူများကဲ့သို့ တောင်ယာလုပ်ငန်းထက် ရပ်ဝေးအလုပ်သစ်တစ်ခုကို ရှာဖွေလုပ်ကိုင်ရန် စိတ်အားထက်သန်နေသည်။ အထူးသဖြင့် စာပေကို လေ့လာဆည်းပူးလိုသည့် ဆန္ဒများ ဖြစ်ပေါ်နေသည်။ တစ်နေ့တွင် တောထဲသွားရင်း မမြှော်လင့်ဘဲ ဆင်ဖြူတစ်ကောင် မြင်လိုက်ရသည်။ ဆင်ပိုင်ရှင် စောသက်ပေါက သူ့အတွက် အတိတ်ကောင်း နိမိတ်ကောင်းဖြစ်ကြောင်း ပြောပြလေသည်။
ဘိုးပိုက်ဆံလောင်းလျာသည် ဆင်ဖြူကို မြင်ရပြီးနောက်ပိုင်း ဆင်တဲထမင်းချက် အလုပ်ကထွက်ပြီး မိဘအိမ်တွင် ပြန်နေလိုက်သည်။ထိုစဉ် စောသက်ပေါ ပြောလိုက်သော တစ်နေ့တွင် အမျိုးသားအကျိုး၊ အများအကျိုးကို ထမ်းဆောင်ရမည် ဟူသော စကားကိုသာ ပြန်လည်ကြားယောင်နေမိသည်။ထို့ကြောင့် မိဘများက သားစိတ်ချမ်းသာစေရန် နော်ဝါး အမည်ရှိ မိန်းကလေးနှင့် အိမ်ထောင်ချပေးလိုက်သည်။ သို့ရာတွင် အိမ်ထောင်ရေး ကံမကောင်းအကြောင်းမလှ၍ သားဦးကို မွေးဖွါးရာမှ ဇနီးသည် ဆုံးသွားလေသည်။ ဤတွင် စောဆာဖိုးဝါးသည် အိမ်ထောင်ရေး သံယောဇဉ်ပြတ်သွားပြီး မိဘနှစ်ပါးကို နှုတ်ဆက်ကာ ရွှေကျင်မြို့ရှိရာ မြေပြန့်ဒေသသို့ ဆင်းလာသည်။ ပထမတွင် ရွှေကျင်မြို့ရှိ ဗုဒ္ဓဘာသာ ဘုန်းတော်ကြီးကျောင်းတွင် တည်းခိုကာ ဗုဒ္ဓဘာသာစာပေများကို သင်ယူသည်။မကြာမီ ဘိုးပိုက်ဆံလောင်းလျာသည် မိရိုးဖလာကိုးကွယ်သော နတ်အယူဝါဒကို စွန့်လွတ်ပြီး ဗုဒ္ဓဘာသာဝင်တစ်ဦးဖြစ်လာလေသည်။ စောဆာဖိုးဝါးသည် ပါရမီဓာတ်ခံရှိသူပီပီ သက်သတ်လွတ်စားသည်၊ ငါးပါးသီလ စောင့်ထိန်းသည်၊ အဓိဌာန်ဝင်သည်။ထို့ကြောင့် ဘိုးပိုက်ဆံသည် အံ့သြလောက်အောင် တိုးတက်ပြောင်းလဲလာလေတော့သည်။
ဤသို့ဖြင့် ၁၈၆၆-ခုနှစ်မှာပင် မူလလူဝတ်ကို စွန့်၍ ၀တ်ဖြူစင်ကြယ်ကို ပြောင်းလဲဝတ်လိုက်သည်။ ရွှေကျင်နှင့် ကျောက်ကြီးအကြားရှိ လေချွန်တောင် နှင့် သက်ကယ်တောင်ပေါ်သို့ သွားရောက်၍ သီလစောင့်ထိန်းခြင်းစတဲ့ အလုပ်များကို ဆက်လက်ကျင့်သည်။ထိုအချိန်မှစ၍ ကရင်ဗြဟ္မာစိုရ်အဖွဲ့ကို ဦးဆောင်ဖွဲ့စည်းတည်ထောင်လိုက်သည်။ထို့ကြောင့် လူအချင်းချင်း မေတ္တာထားနိုင်ရန် ဗြဟ္မာစိုရ်တရားကို စတင်ဟောပြော၊ဆော်သြလိုက်သည်။စောဆာဖိုးဝါး၏ သတင်းသည် တောမီးပမာ ရပ်ဝေးရပ်နီးဆီသို့ ပျံ့နှံ့သွားတော့သည်။ ဤသို့ဖြင့် ရပ်ဝေးရပ်နီးရှိ အမျိုးသားအပါအ၀င် နယ်ရှိလူများအားလုံး လေချွန်တောင်ပေါ်သို့ စုဝေးရောက်ရှိလာကြသည်။ထိုအချိန်မှစ၍ ဘိုးပိုက်ဆံဟု အမည်တွင်သွားသည်။
ဘိုးပိုက်ဆံကို မနာလိုသူတို့က တိုင်ကြားမှုကြောင့် ဗြိတိသျှအစိုးရက ဖမ်းဆီးလိုက်သည်။ အပြစ်မရှိဘဲ အချုပ်က လွတ်လာပြီးနောက် ၁၈၈၂-ခုနှစ်သို့ရောက်လျှင် သူ့နောက်လိုက်များနှင့်အတူ ရွှေကျင်မြို့ နိုင်ငံခြားခရစ်ယာန်သာသနာပြုအဖွဲ့ထံ ၀င်ရောက်ခိုလှုံခဲ့ရသည်။ ၁၈၈၈-ခုနှစ်သို့ရောက်လျှင် ဘိုးပိုက်ဆံနှင့်နောက်လိုက်များသည် ဖဒိုပလော(ခေါ်) ဖဒိုရွာကြီးကို တည်လိုက်သည်။ဖဒိုရွာသည် ညောင်လေးပင်မြို့နယ်၊ ပိန်းဇလုပ်၏ အနောက်ဘက်(၇)မိုင်ကျော်အကွာတွင် တည်ရှိသည်။
သာသနာပြုအဖွဲ့၏အကူအညီဖြင့် မြေဧကပေါင်း(၁၅၀၀၀)ကို ဂရမ်ရလိုက်သည်။ဘိုးပိုက်ဆံသည် မူလဗြဟ္မာစိုရ်အခြေခံတရားနှင့် ခရစ်ယာန်တရားကို ပေါင်းစပ်၍ ခရစ်ယာန်ဘာသာသို့ ကူးပြောင်းသွားလေသည်။ဘိုးပိုက်ဆံ၏ အယူဝါဒမှာ ဘာသာပေါင်းစုံမှ အလေးထားအပ်သော ဗြဟ္မစိုရ်အခြေခံတရားပင်ဖြစ်ပါသည်။ အလှူဒါနပြုရာတွင်လည်း တစ်ခေတ်တစ်ခါက ထင်ရှားသော ရသေ့ကြီးဦးခန္ဓီနှင့် တန်းတူလောက်ရှိသည်ဟု ဆိုပါသည်။ ၁၉၁၂-ခုနှစ်၊အသက်(၇၀)အရွယ်တွင် ဘိုးပိုက်ဆံသည် ဖဒိုရွာကြီး၌ပင် ထူးဆန်းစွာ ပျောက်ဆုံးခြင်းနှင့်အတူ သေဆုံးသွားလေသည်။သို့ရာတွင် သူ့ကို ကြည်ညိုလေးစားသူများက တစ်နေ့တွင် ဘိုးပိုက်ဆံပြန်လာဦးမည်ဟု ယုံကြည်နေဆဲဖြစ်သည်။